Med føtene på jorda
Då vi for nokre år sidan la opp idéar og visjonar for åra som skulle kome hadde årets festival arbeidstittelen “jorda” - med det som gror, det som gir oss liv, det som forsvinn, det som held alt i hop, det vi øydelegg og det vi er.
Undervegs vart det tydelig for oss at vi vart meir og meir jorda det meir vi tenkte og programmerte. Vi ville attende til kjerna, til kammermusikken, til samspelet, til møtet mellom publikum og utøvarar - det som gjer at vi grøder. Vi ville senke dørterskelen og gjere porten vid, sleppe publikum tett innpå oss. Difor har vi vore frie i programmeringa, og lagt fleire av hovudkonsertane i mykje mindre lokaler enn tidlegare, Sandane kyrkje og bygdehuset Vonheim. I tillegg vert det som vanleg ein storslått tur innom kultursalen med Håvard Gimse ved flygelet.
Musikarane
Vi har samla framifrå festivalmusikarar som veit vil finne høve til å gneistre for glopparane, og vi garanterer store opplevingar i intime format frå en internasjonal gjeng med tydelege stemmer og sterk formidlingsevne.
Francisco López (fløyte), Maria Włoszczowska (fiolin), Anders Nilsson (fiolin), Aine Suzuki (bratsj), Charles-Antoine Archambault (cello), Kenneth Ryland (bass) og Håvard Gimse (piano) vil saman med våre kunstnarlege leiarar Ida Klokk-Bryhn (bratsj) og Audun Sandvik (cello) servere oss eit saftig program med spenn frå wienervals til kontemporær solobass.
Kammerjazz i Vonheim
På toppen av hovudprogrammet får vi ein heilt spesiell kveld i Vonheim med kammerjazz og viser frå Maridalen og Lars Lillo-Stenberg. Vi gler oss!
Kvernberg/Bjørdal
Og medan me ventar på festival…
Gloppen Musikkfest inviterer til forsommarkonsert på Lauget!
Jorun Marie Kvernberg og Kristina Farstad Bjørdal har dei siste åra utvikla eit tett og spanande duosamarbeid, der folkemusikk og kunstmusikk møtest på ein måte som kjennest både sjølvsagt og overraskande. I samspel og arrangement spelar dei på kvarandre sine sterke sider: det rytmiske drivet, dei små nyansane og den munnlege tradisjonen frå folkemusikken, og det klanglege, dynamiske og virtuose frå kunstmusikken.
Jorun Marie Kvernberg er ein av dei mest markante folkemusikarane i landet, kjend både som felespelar, hardingfelespelar, songar og komponist. Ho har ei heilt eiga formidlingsevne og eit uttrykk som rommar både det rå, vare og det finurlege. Som komponist har ho markert seg sterkt, mellom anna med Edvardprisen..
Kristina Farstad Bjørdal er ein særs allsidig akkordeonist og trekkspelar, med bakgrunn frå både folkemusikk, improvisasjon, samtidsmusikk og klassisk musikk. Ho har ei sjeldan evne til å finne balansen mellom det kraftfulle og det lyttande, og tilfører samspelet både presisjon, varme og stor musikalsk energi. Bjørdal er òg ein viktig tradisjonsberar innan folkemusikken på trekkspel, og vart i 2021 tildelt Bolstadprisen for arbeidet sitt.
På konserten får publikum møte Jorun Marie Kvernberg sine eigne komposisjonar, mellom anna utdrag frå verket Insomnia, i tillegg til duoen sine eigne arrangement av folkemusikk. Her ligg både sterke forteljingar, drivande rytmikk, vakre melodilinjer og stor speleglede i botnen. Kanskje dukkar det også opp ein tango eller to.
